Responsibilidad: Mga Puwedeng Ipagawa sa mga Bata Ayon sa Kanilang Edad

Gusto mo bang maturuan ang iyong anak ng disiplina? Pupuwede naman sapamamagitan ng pagtuturo sa kanilang sumunod sa ilang mga gawaing pambahay. Nagsisimula ang disiplina sa mga bata kapag nagagawa na nila ang ilang bagay na iyong pinagagawa nang hindi ka na sumisigaw, namumuwersa o nangungulit. Kapag nagagawa na ito ng bata, unti-unti na niyang natututunan ang kahalagahan ng tungkulin.

Para sa maraming magulang, hindi sila komportableng magbigay ng responsibilidad sa kanilang anak. Maaaring hindi naman kasi nagagawa nang maayos ng bata ang kaniyang tungkulin o hindi talaga ginagawa ng bata ang inaasahan mula sa kaniya. Dahil sa mga dahilang ito, imbis na tumaas ang presyon, si nanay o si tatay na lang ang gagawa. Pero tandaan, makagagawa na ang mga bata ng mga bagay na hindi mo inaasahan. Baka nakalilimutan mo, ang batang gumagamit ng computer, na sadyang komplikado para sa maraming matanda, ay makapagpapa-andar ng isang simpleng appliance tulad ng washing machine.

Sa pangkalahatan, makagagawa ang bata sa preschool ng isa hanggang dalawang payak na gawain habang mas maraming komplikadong gawain ang kaya ng mas matanda. Naririto ang mga puwedeng ipagawa sa bata ayon sa kaniyang edad.

Mga gawaing puwede para sa 2 – 3 taong gulang

• Ipatabi ang mga laruan

• Pakainin ang alagang hayop

• Ipalagay ang maruruming damit sa labahan

• Ipapunas ang nabasa o nadumihang tela o bagay

• Ipapagpag ang maruming bagay

• Ipagpatung-patong ang mga magasin o aklat

Mga gawaing puwede para sa 4 – 5 taong gulang

Mga gawain para sa mga 2 – 3 taong gulang at:

• Ipaayos ang kama

• Ipatapon ang basura sa basurahan

• Ipalagay ang mga ginamit na plato o pinggan sa kusina

• Ipabunot ang mga damo sa hardin

• Ipagamit ang vacuum para linisin ang alikabok o mumo

• Ipadilig ang halaman

• Ipaligpit ang nahugasang mga kubyertos

• Ipahugas ang mga plato o basong yari sa plastik

Mga gawaing puwede para sa 6 – 7 taong gulang

Mga gawain para sa mga 2 – 5 taong gulang at:

• Ipaghiwalay ang puti sa mga damit na may kulay bago labhan

• Ipawalis ang sahig

• Ipaayos at ipalinis ang hapag-kainan

• Ipatulong sa paggawa at pagbalot ng recess o lunch

• Ipatanggal ang damo at dahon sa paligid ng bahay

• Ipapanatiling malinis ang sariling silid

Mga gawaing puwede para sa 8 – 9 taong gulang

Mga gawain para sa mga 2 – 7 taong gulang at:

• Ipapuno ang washing machine

• Ipaayos ang mga nabili sa grocery

• Ipagamit ang vacuum

• Magpatulong sa paggawa ng hapunan

• Magpagawa ng sariling meryenda

• Ipalinis at ipapunas ang maruming hapag-kainan

• Ipaligpit ang sariling kailangang labhan

• Ipaayos ang butones ng sariling damit

• Ipagawa ang sariling agahan

• Ipabalat ang mga gulay at prutas

• Ipagawa ang simpleng pagluto tulad ng paggawa ng toast bread

• Ipalinis ang sahig

Mga gawaing puwede para sa higit 9 taong gulang

Mga gawain para sa mga 2 – 9 taong gulang at:

• Ipaligpit ang mga nahugasang plato, platito at kubyertos

• Ipatupi ang mga nalabhang damit

• Ipalinis ang banyo

• Ipalinis at ipapunas ang bintana

• Ipalinis at ipahugas ang kotse

• Magpaluto ng simpleng pagkain na may gumagabay na matanda

• Ipaplantsa ang mga damit

• Ipalaba ang damit

• Ipaalaga ang mga batang kapatid

• Ipalinis ang kusina

• Ipapalit ang mga punda ng kama at unan

Hindi pa huli ang lahat. Simulan ang paghubog sa batang may disiplina. Simulan ang pagpapa-unawa sa pagkakaroon ng responsibilidad. Simulan mo na ito sa iyong sariling tahanan.